Այցելություն Կալկաթա և մասնակցություն Սուրբ Ծննդյան Պատարագին

07 հունվարի, 2024

2024թ. հունվարի 5-6-ը Հնդկաստանում ՀՀ դեսպան Վահագն Աֆյանն ու դեսպանության դիվանագետներն ընտանիքի անդամների հետ միասին այցելությամբ գտնվում էին Կալկաթայում՝ Սուրբ Ծննդյան Պատարագին և Ջրօրհնեքի կարգին մասնակցության, ինչպես նաև Հնդկաստանի տարբեր վայրերից ժամանած և տեղի փոքրաթիվ հայ համայնքի ներկայացուցիչների հետ հանդիպման նպատակով:

Այցի առաջին օրը Կալկաթայում հարյուրամյակներ գործող հայտնի Հայոց մարդասիրական ճեմարանում դեսպանության դիվանագետների ողջ անձնակազմով առաջին անգամ նման այցի իրականացման ողջույնի խոսքերով է հանդես եկել Հնդկահայոց հոգևոր հովիվ Տ. Տաճատ վարդապետ Ծատուրյանը: ՀՀ դեսպանը հանդիպում է ունեցել նաև Կալկաթայի Սուրբ Նազարեթ եկեղեցու վարչության անդամներ Սյուզան Ռուբենի և Սյունիլ Սոբթիի հետ: Քննարկվել են ՀՀ դեսպանության հետ ավանդական դարձած արդյունավետ և հետագա նպատակային համագործակցությանն առնչվող հարցեր: Դեսպան Վ. Աֆյանը նաև ծանոթացել է վարժարանի սաների, նրանց ուսումնական ձեռքբերումների, ինչպես նաև ուսուցչական կազմի հետ՝ խորհրդանշական նվերներ հանձնելով Աստվածհայտնության նախատոնակի կապակցությամբ:

Հաջորդ օրը Հոգևոր հովվի կողմից Սուրբ Նազարեթ Մայր եկեղեցում մատուցված Պատարագից, ինչպես նաև Հայոց մարդասիրական ճեմարանում ՀՀ դեսպանին և նրան ուղեկցող դիվանագետներին ողջույնի պաշտոնական արարողությունից ու ճեմարանի հուշամատյանում գրառումից հետո համայնքային հարցերին նվիրված քննարկումներ են ծավալվել Կալկաթայի Հայկական մարզական ակումբում: ՀՀ դեսպանը, կարճատև հանդիպում ունենալով նաև Հնդկաստանի Արևմտյան Բենգալ նահանգի հոգաբարձուների խորհրդի պաշտոնական ներկայացուցիչ Բիպլաբ Ռոյի հետ, մտքեր է փոխանակել Կալկաթայում հայկական դարավոր ներկայությանը վերաբերող փաստագրական նմուշների հետագա հնարավոր ցուցադրության կազմակերպման վերաբերյալ: Կալկաթայում գտնվելու օրերին այցելություններ են տեղի ունեցել նաև Սուրբ Երրորդություն և Սուրբ Գրիգոր Լուսավորիչ եկեղեցիներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր